1997թ-ի ապրիլի 28-ին ամերիկահայ բարերար Ռիթա Պալեանի և այդ շրջանում Ազգային Ժողովի պատգամավոր Հրանուշ Հակոբյանի ջանքերով ստեղծվեց Հայ-Ամերիկյան Մամոգրաֆիայի Համալսարանական Կենտրոնը, որը 2002թ. վերանվանվեց “Հայ-Ամերիկյան Առողջության Կեն¬տրոն” հիմնադրամ: 2003թ-ի հուլիսին ՀԱԱ Կենտրոնը մասնաճյուղ ստեղծեց Գավառ քաղաքում:
Կենտրոնի նպատակն է պահպանել, բարելավել մարդկանց առողջությունը, իրականացնել կրծքագեղձի, արգանդի պարանոցի, շագանակագեղձի քաղցկեղի կանխարգելման, ոսկորների խտության որոշմամբ կոտրվածքների կանխարգելման ծրագրեր, ինչպես նաև նպաստել ընտանիքի առողջության պահպանմանը, առողջ ապրելակերպի քարոզչությանը կրթական ծրագրերի միջոցով:
Կենտրոնում գործում են ռենտգեն ճառագայթային և ուլտրաձայնային հետազոտման, ճառագայթային ախտորոշման, գինեկոլոգիայի, ուռոլոգիայի, ընտանեկան բժշկության և էնդոկրինոլոգիայի, ոսկրային հյուսվածքի խտության որոշման (դենսիտոմետրիա) բաժանմունքներ, ատամնաբուժարան, վիրահատարան, վերականգնողական թերապիա և լաբորատորիա:
ՀԱԱ Կենտրոնի գործունեության 20 տարիների ընթացքում կատարվել է ավելի քան 429,354 հետազոտություն:
Այսօր մեծ թվով կանայք գալիս են իրենց ամենամյա պրոֆիլակտիկ զննման համար, ինչի շնորհիվ հնարավոր է դառնում կրծքագեղձի քաղցկեղը հայտնաբերել վաղ, դեռևս սաղմնային փուլում` ապահովելով լիարժեք բուժման մեծ հնարավորություւններ: Ամենամյա զննումների շնորհիվ փրկվածների թիվը քիչ չէ` 5,227 կին: Սա նշանակում է, որ կենտրոնում ճիշտ ժամանակին բացահայտվել, կանխվել և բուժվել է կանանց կյանքին ու հմայքին սպառնացող հիվանդությունը` բերկրանք պարգևելով նաև նրանց ընտանիքներին:
ՀԱԱԿ-ի գրեթե բոլոր բժիշկները մեկից երեք ամիս վերապատրաստվել են ԱՄՆ-ի առաջատար բժշկական կենտրոններում: Որոշ բժիշկներ վերապատրաստվել են նաև Եվրոպայի առաջնակարգ կլինիկաներում: Բացի այդ, յուրաքանչուր տարի երկու-երեք անգամ բազմաթիվ ամերիկացի և եվրոպացի բժիշկներից բաղկացած խմբեր են այցելում կենտրոն և աշխատում կենտրոնի բժիշկների հետ, ինչպես նաև Գավառ մասնաճյուղի բժիշկների հետ, ընդունում հիվանդներ, կազմակերպում գիտական սեմինարներ և մեր բժիշկներին փոխանցում բժշկագիտության բնագավառի նորություններն ու ձեռքբերումները:
ՀԱԱԿ-ը Երևանի պետական բժշկական համալսարանի ուսանողների և օրդինատորների համար հանդիսանում է ուսումնական բազա, ինչպես նաև հանրապետության համապատասխան բժիշկների համար վերապատրաստման կենտրոն:
Հայ-Ամերիկյան Առողջության Կենտրոնը մշտապես զբաղվում է ազգաբնակչությանն իրազեկելու, տեղեկացնելու միջոցառումներով, տպվում և բանժանվում են տարեկան մոտ 250 000 բրոշուրներ: Կազմակերպվում են կլոր սեղաններ, հանդիպումներ, ինչպես նաև Կենտրոնի բազայի վրա անցկացվում են միջազգային գիտական համաժողովներ, սեմինարներ:
Մինչ օրս, ՀԱԱԿ-ը Հայաստանի 91 հեռավոր քաղաքներում, գյուղերում և երեքը Արցախում իրակնացրել է 311 Բժշկական արտագնա այցելություններ, որի ընթացքում 19,216 հիվանդների անվճար մատուցվել է 24,085 հետազոտություն: Արտագնա այցելությունների իրականացման համար Կենտրոնը համագործակցում է մարզերի պոլիկլինիկաների, դպրոցների, գործարանների և տեղական ինքնակառավարման մարմինների ներկայացուցիչների հետ: